Milli Qəhrəman atası, son mənzilə yola salındı

Xəbər verdiyimiz kimi, Azərbaycanın tanınmış mədəniyyət xadimi, Əməkdar artist Akif Mirabov, Milli Qəhrəman Rəşad Mirabovun atası, dünyasını dəyişib.

Onun vəfatı həm Mirabovlar ailəsi, həm də ölkənin mədəni ictimaiyyəti üçün böyük itki kimi dəyərləndirilir. Bu gün mərhum Akif Mirabov doğulduğu şəhər olan Mingəçevirdə dəfn edilib. Dəfn mərasimində geniş ictimaiyyət, şəhər sakinləri və mədəniyyət nümayəndələri iştirak ediblər.

Vida mərasimində Mədəniyyət Nazirliyinin nümayəndələri, Mingəçevir Şəhər İcra Hakimiyyətinin başçısı İlham İsmayıl, Şəhərin hüquq-mühafizə orqanlarının rəhbərləri, Yazıçı, şair, incəsənət adamları, ictimai fəallar və Mingəçevir ictimaiyyəti mərhuma son ehtiramlarını bildiriblər. Mərasim zamanı Akif Mirabovun sənətə verdiyi töhfələr, mədəniyyət sahəsindəki fəaliyyəti və ömür yolunun xalq üçün dəyəri xüsusi vurğulanıb.

Akif Mirabov uzun illər Azərbaycanın mədəniyyət sahəsində fəaliyyət göstərmiş, səhnə sənətinə böyük töhfələr vermiş bir sənətkar idi. O, aktyorluq fəaliyyəti, mədəni tədbirlərdə iştirakı, həmçinin gənc nəslin sənətə yönləndirilməsində fəal rolu ilə tanınırdı. Səmimiyyəti, sənətə olan sevgisi və davranış mədəniyyəti ilə hər zaman hörmət qazanmışdı.

Rəşad Mirabov — Azərbaycanın ərazi bütövlüyü uğrunda canını fəda etmiş, ölkəmizin ən yüksək fəxri adı olan “Azərbaycanın Milli Qəhrəmanı” fəxri adına layiq görülmüş igid döyüşçülərdən biridir.

O, gənc yaşlarından Vətənə bağlılığı, döyüşlərdə göstərdiyi şücaət, iradə və qəhrəmanlığı ilə yadda qalıb. Şəhidlik zirvəsinə ucalan Rəşad Mirabov bu gün də Azərbaycan gəncliyi üçün Vətən sevgisi və fədakarlıq nümunəsi kimi tanınır.

Mərhum Əməkdar artist Akif Mirabovun dəfn mərasimi Mingəçevir şəhərində böyük ehtiramla keçirilib. Onun həyat yolu və sənət irsi hər zaman xatırlanacaq.