Mingəçevir şəhərində yeni tam orta məktəb yaradıldı
Mingəçevir şəhərinin təhsil infrastrukturunun təkmilləşdirilməsi istiqamətində növbəti mühüm addım atılıb. Şəhərdə fəaliyyət göstərən Ağdam rayonunun 26, 47 və 52 nömrəli tam orta məktəbləri birləşdirilərək, yeni yaradılan Mingəçevir şəhər 22 nömrəli tam orta məktəbi kimi fəaliyyətə başlayıb.
Yeni təhsil müəssisəsi Mingəçevir Şəhər Təhsil Sektorunun tərkibində fəaliyyət göstərəcək. Məktəbin yaradılmasında əsas məqsəd tədrisin keyfiyyətini artırmaq, idarəetmədə səmərəliliyi təmin etmək və şagirdlərin daha müasir təhsil mühitində bilik almasına şərait yaratmaqdır.
Qeyd edək ki, məktəblərin birləşdirilməsi prosesi Təhsil Nazirliyinin struktur optimallaşdırılması siyasəti çərçivəsində həyata keçirilir. Bu addım həm də müəllim heyətinin peşəkar potensialının daha səmərəli istifadəsinə, tədris planlarının vahid idarəetmə prinsipləri əsasında qurulmasına imkan verəcək.
Yeni məktəbdə tədris prosesinin müasir tədris standartlarına uyğun təşkili, texnoloji təminatın gücləndirilməsi və fənn laboratoriyalarının yenilənməsi planlaşdırılır.
Təhsil mütəxəssislərinin fikrincə, bu cür islahatlar regionlarda təhsilin keyfiyyətinə müsbət təsir göstərəcək, eyni zamanda şagirdlərin fərdi inkişafına geniş imkanlar açacaq.
