Mingəçevirdə ağacların kəsilməsi ilə bağlı araşdırma aparılır
Daxili İşlər Nazirliyinin (DİN) Mətbuat Xidmətinin Şəki regional qrupundan verilən məlumata görə, Mingəçevir şəhəri 20 Yanvar küçəsində ağacların qanunsuz şəkildə kəsilməsi faktı ilə bağlı Şəhər Polis Şöbəsində prosessual araşdırma başlanılıb.
Məlumata əsasən, məsələ ilə bağlı hüquq-mühafizə orqanları tərəfindən əraziyə baxış keçirilib, faktın dəqiq səbəbləri və məsul şəxslər müəyyənləşdirilir. Araşdırmanın nəticələrinə uyğun olaraq qanunvericiliyə əsasən zəruri tədbirlərin görüləcəyi bildirilib.
Qeyd edək ki, son dövrlər ölkənin müxtəlif bölgələrində yaşıllıqların qorunması istiqamətində nəzarət tədbirləri gücləndirilib. Ekoloji tarazlığın qorunması və vətəndaşların şikayətlərinin operativ araşdırılması məqsədilə aidiyyəti qurumlar arasında koordinasiyalı fəaliyyət davam etdirilir.
