Mingəçevirin abadlaşan simasında əsas rol: Mənzil Kommunal Təsərrüfatı İstehsalat Birliyi
Son illər Mingəçevir şəhərinin simasında müşahidə olunan sürətli inkişaf, genişmiqyaslı abadlıq və quruculuq işləri təsadüfi deyil. Bu işlərin planlı, davamlı və keyfiyyətli şəkildə həyata keçirilməsində Mingəçevir şəhər İcra Hakimiyyətinə bağlı qurum olan Mingəçevir Mənzil Kommunal Təsərrüfatı İstehsalat Birliyi mühüm rol oynayır.
Birliyin fəaliyyəti şəhər təsərrüfatının ən vacib sahələrini əhatə edir. Küçə və prospektlərin təmizliyi, yaşıllıqların salınması və qorunması, park və istirahət məkanlarının abadlaşdırılması, həyətlərin səliqə-sahmana salınması, kommunal infrastrukturun gündəlik nəzarətdə saxlanılması bu qurumun əsas fəaliyyət istiqamətlərindəndir.
Xüsusilə qeyd etmək lazımdır ki, Mingəçevirdə aparılan abadlıq-quruculuq işlərinin əksəriyyəti məhz Şəhriyyar Mustafayevin rəhbərlik etdiyi Mingəçevir şəhər İcra Hakimiyyətinin nəzdində fəaliyyət göstərən bu birlik tərəfindən icra olunur. İşlərin çevik təşkili, operativ müdaxilə və məsuliyyətli yanaşma şəhər sakinləri tərəfindən də müsbət qarşılanır.
Mənzil Kommunal Təsərrüfatı İstehsalat Birliyi mövsümi işlərə də xüsusi diqqət yetirir. Payız-qış aylarında yolların və səkilərin təhlükəsizliyi, yaz-yay mövsümündə isə yaşıllıq zolaqlarının genişləndirilməsi, gül-çiçək kompozisiyalarının yaradılması Mingəçevirin daha estetik və rahat şəhərə çevrilməsinə xidmət edir.
Görülən işlərin miqyası onu deməyə əsas verir ki, Mingəçevir təkcə sənaye şəhəri kimi deyil, eyni zamanda müasir, təmiz və yaşıl bir yaşayış məkanı kimi formalaşır. Bu prosesdə isə Mənzil Kommunal Təsərrüfatı İstehsalat Birliyinin əməyini xüsusi vurğulamaq yerinə düşür.
Şəhər rəhbərliyinin diqqəti və birliyin kollektivi tərəfindən göstərilən səylər nəticəsində Mingəçevir günbəgün daha da gözəlləşir və sakinlər üçün komfortlu şəhər mühitinə çevrilir.
