Müasir Universitet, müasir gənclik, güclü gələcək

2 Fevral – Azərbaycan Gəncləri Günü münasibətilə Mingəçevir Dövlət Universitetinin bütün tələbələrini, magistrantlarını, doktorantlarını və gənc əməkdaşlarını ürəkdən təbrik edirəm. Bu əlamətdar gün ölkəmizin ictimai-siyasi, elmi və mədəni həyatında fəal rol oynayan gənclərimizin cəmiyyət üçün nə qədər böyük dəyər daşıdığını bir daha nümayiş etdirir. Azərbaycan gəncliyi bu gün yalnız bilik əldə edən deyil, eyni zamanda təşəbbüs göstərən, məsuliyyət daşıyan və gələcəyə inamla baxan bir nəsildir.
Mingəçevir Dövlət Universitetində təhsil alan gənclər də bu inkişafın ayrılmaz hissəsidir. Sizlər müasir düşüncəli, innovasiyalara açıq, rəqabətədavamlı kadrlar kimi formalaşırsınız. Universitet rəhbərliyi olaraq əsas məqsədimiz gənclərin potensialını üzə çıxarmaq, onların ideyalarını dəstəkləmək, elmi araşdırmalara, sosial və ictimai fəaliyyətlərə daha fəal cəlb olunmaları üçün hərtərəfli şərait yaratmaqdır. Çünki biz inanırıq ki, güclü universitet güclü gəncliklə mümkündür.
Bir rektor kimi xüsusilə qeyd etmək istəyirəm ki, müasir Azərbaycanın müasir gəncləri ilə birgə çalışmaq mənim üçün böyük qürur mənbəyidir. Sizin dünyagörüşünüz, texnologiyaya yaxınlığınız, milli-mənəvi dəyərlərə bağlılığınız və eyni zamanda qlobal düşüncə tərziniz ölkəmizin sabahını daha parlaq edir. Gənclərin hər bir uğuru universitetimizin, hər bir nailiyyəti isə Azərbaycanın uğurudur.
Əminəm ki, sizlər əldə etdiyiniz bilik və bacarıqları gələcəkdə ölkəmizin inkişafına yönəldəcək, dövlətçiliyimizə sədaqətlə xidmət edəcəksiniz. Bu yolda sizə daim dəstək olmaq, yol göstərmək və inkişafınıza töhfə vermək bizim əsas vəzifəmizdir. Bir daha hər birinizi 2 Fevral – Azərbaycan Gəncləri Günü münasibətilə təbrik edir, sizə möhkəm iradə, parlaq ideyalar, davamlı uğurlar və işıqlı gələcək arzulayıram.

Mingəçevir Dövlət Universitetin Rektoru Anar Eminov