Mingəçevirdə 1 yaşlı körpəsini zirzəmiyə atan ana saxlanılıb

Oktyabrın 12-də Mingəçevirdə insanlığı sarsıdan hadisə baş verib. Şəhər ərazisində 1 yaşlı körpəsini binanın zirzəmisinə atan qadının kimliyi polis əməkdaşları tərəfindən qısa müddətdə müəyyən olunub. Məlumata görə, 1994-cü il təvəllüdlü G. Məmmədova hadisədən dərhal sonra saxlanılıb.

Əraziyə cəlb olunan hüquq-mühafizə orqanlarının əməkdaşları körpəni zirzəmidən çıxararaq tibbi müayinəyə göndərib. Hazırda balaca uşağın vəziyyəti araşdırılır və onun səhhəti nəzarətdə saxlanılır.

Faktla bağlı Mingəçevir Şəhər Polis Şöbəsində cinayət işi açılıb. Hadisənin səbəblərinin müəyyən edilməsi, eləcə də qadının bu addımı nə üçün atdığı istiqamətində istintaq tədbirləri davam etdirilir.

Qeyd edək ki, bu cür davranış qanunvericilikdə ağır cinayət hesab olunur və məsul şəxslər barəsində qanunla nəzərdə tutulmuş ciddi tədbirlər görülür.