Bir ananın fədakarlığı: Görmə məhdudiyyətli gəncin qırmızı diplom sevinci

İbtidai sinif müəlliməsi ana, oğlunun təhsili üçün hər şeyi geridə qoyaraq Mingəçevirə köçüb. Nəticə: Əzmlə oxuyan gənc qırmızı diplomla məzun oldu.

MDU-nun Tarixi müəllimliyi ixtisası üzrə məzun olan Heydər Qafarlı, görmə məhdudiyyətinə baxmayaraq, böyük əzmlə təhsilini davam etdirib.

Onun yanında fədakar anası, İsmayıllıda ibtidai sinif müəlliməsi, oğlunun təhsili üçün evini və işini tərk edərək Mingəçevirə köçüb. Bu addım, bir ananın səssiz fədakarlığının ən parlaq nümunəsidir.

Heydər son dörd il ərzində hər gün yorulmadan dərs oxuyub, dərslərini əzbərləyib və danışma bacarığını inkişaf etdirib. Hər gün dərsə hazırlıqlı gələn tələbə əlaçı olub və təqaüd qazanıb.

Nəhayət, bütün səylərin nəticəsi olaraq, Heydər Qafarlı ali təhsilini qırmızı diplomla başa vurub.

Bu hekayə, həm bir ananın, həm də bir gəncin əzminin, fədakarlığının və mübarizəsinin ən gözəl nümunəsi olaraq oxuculara təqdim olunur.